Gott að eiga Davíð að á erfiðum tímum

Davíð átti stjörnuleik í Kastljósinu þegar hann sannaði fyrir sjálfum sér og þjóðinni að hann einn væri traustsins verður á Íslandi í dag. Hann var aldrei með í útrásarsvínaríinu og er sá eini sem er að gera eitthvað núna. Og hann fann ekki annað en hann nyti trausts. Í lokinn nánast klökknaði hann yfir því hvað hann var góður. Ég er glaður að hann gat leiðrétt alls konar misskilning sem ég var með í kollinum, eins og það að stjórnmálaforinginn Davíð bæri ábyrgð á því að frjálshyggjunni var skellt á skeið, að markvisst var unnið að því að draga úr öllu eftirliti og hömlum á starfsemi óðafjárfestanna. Og baktjaldamakk og einkavinavæðing, allt þetta ólýðræðislega brölt sem pottaglamrarar eru búnir að tala um, ekkert af þessu er þá sennilega nokkuð á hans ábyrgð. Hann er búinn að vera á fullu að mylja undir þá sem verst hafa það. Og þetta myndband þar sem hann hrópar húrra fyrir útrásarköppunum er örugglega bara bull líka, fyrst hann var aldrei hrifinn af þeim. Hvar værum við stödd núna ef hann væri ekki á vaktinni að bjarga þjóðinni? Það er gott að Höskuldur litli stendur vaktina með honum og passar upp á að vond stjórnvöld reki hann ekki á dyr.

SÍ naut trausts erlendis

Athugasemdir

[Skeggi Skaftason, 24.2.2009 kl. 21:35]

Mikið rétt hjá þér, Friðrik Dagur.

Ég er með nagandi samviskubit yfir því að hafa mótmælt kallinum, ég lét algjörlega heilaþvo mig af áróðursmaskínunni! Búinn að þvo munninn upp úr sápu síðan ég stóð upp úr sófanum, klökkur eftir þessa 50 mínútna sannleiksvakningu.

[Malla (IP-tala skráð) 24.2.2009 kl. 21:59]

Vissi ekki að þú værir farinn að blogga, nú ert þú kominn inn í favorites hjá mér ;)  Ég sá smá glefsur úr þessu viðtali, og mikið svakalega var hann að reyna að kenna Sigmari að taka viðtal...... "Þú mátt bara ekki" og svo framvegis.  En þetta er Ísland í dag.

[corvus corax, 25.2.2009 kl. 01:42]

Já, mikill er andskotinn!

[Svandís Svavarsdóttir (IP-tala skráð) 28.2.2009 kl. 00:15]

Velkominn á bloggslóðir. Er sjálf að ræsa út nýtt blogg.