Brunnmiga - glæsileg framtíðarsýn!

Það er sorglegt að sjá að þetta lið hefur ekkert skilið, ekkert lært og virðist ekki hafa neinn vilja til að átta sig á víðara samhengi hlutanna. Það er enn sama stóriðjuáherslan, sama skammtímanotkunin á náttúrunni á dagskrá og svo á þetta bara að reddast. Aðrir verða að taka til eftir sóðaskap þeirra, enda eru þeir að komast upp á lagið með það og þykir ekki tiltökumál. Sjálfbær þróun vefst fyrir þeim og það er enn verið að leita að stórkarlalegum lausnum í anda 2007. Það er búið að sýna fram á að það er ekki hægt að haga sér bara eins og manni sýnist. Ekki er hægt að ganga á loftgæði og auðlindir án þess að það skerði mjög möguleika komandi kynslóða að lifa mannsæmandi lífi. Það þykir ekki gáfulegt að pissa í brunninn sinn. Það er nefnilega vel til þess fallið að spilla framtíðarmöguleikum þeirra sem ætla að nota hann. En Sjálfstæðismenn og Framsóknarmenn virðast endalaust vera til í að vera hinir íslensku brunnmigar og munu vafalaust renna saman í ríkisstjórn um hvers kyns auðlindasóðaskap og sérgæsku. Þeim er enda mikið í mun að tryggja að þeir sem sölsuðu undir sig eignir og fé í nafni þeirra geti haldið áfram að eignast það sem þeir ekki eiga og ættu ekki að eiga. Þannig tryggja þeir áframhaldandi tök sín á landi og þjóð - þjóð og landi til tjóns.

Sjálfstæðismenn og framsóknarmenn í meirihluta

Athugasemdir

[Orfeus (IP-tala skráð) 7.4.2009 kl. 10:47]

Já, þetta ætti að sýna fólki hvílík nauðsyn það er að kjósa sem fyrst svo Alþingi verði ekki háð þessum bófum, sem mynda þessa tvo flokka og er þó framsóknarmafían sýnu verri. Í fyrsta lagi er það nú sú fávíslega hugmyndafræði, að setja öll okkar fjöregg í álkörfuna. Við erum nú þegar alltof háð duttlungum þessarar alþjóðlegu glæpaklíku sem rekur áliðnaðinn. Í öðru lagi erum við komin upp að vegg með að nýta sjálf orkuna, því við fáum hvergi lánsfé til nýframkvæmda og því yrði að framselja virkjunarréttin til erlendra fyrirtækja og þá væntanlega þeirra hinna sömu, og nota orkuna og myndu þá skammta verð aðfanganna að sínum geðþótta, sem þau gera raunar þegar í dag með því að orkuverðið er tengt "heimsmarkaðsverði" á áli, sem þau búa sjálf til eftir eigin geðþótta. Landsvirkjun er tæknilega gjaldþrota og bara spurning um hvenær en ekki hvort, erlendir lánardrottnar taka fyrirtækið yfir. Það hefur þegar ráðstöfunarrétt á hagkvæmasta hluta virkjanlegrar vatnsorku á Íslandi, þannig að við eigum ekki eftir annað en dýrari, og óhagkvæmari virkjunarkosti.