Löngu tímabært

Það er löngu orðið tímabært að þarna verði gripið til raunverulegra aðgerða. Þarna hafa orðið banaslys, árekstrar og oft legið við að illa fari vegna þess hvernig aðstæður eru og ökumenn haga sér. Minnihlutinn í Reykjavík lagði fram fyrirspurn nú í febrúar um hvað meirihlutinn ætlaði að gera varðandi umferðaröryggið á Kjalarnesinu og fékk svör sem voru í sjálfu sér ekki slæm, en færðu ekki fram neitt ákveðið til að byggja á. Og því var hvatt til þess að fastar yrði tekið á málum. Vonandi eru mál í einhverju ferli sem sjálfsagt tekur einhvern tíma, en gallinn er sá að við höfum ekki tíma til vangaveltna heldur er nú kominn tími til aðgerða.

Það er frábært að íbúarnir ætla ekki að bíða lengur heldur varpa ljósi á stöðu mála þannig að eftir verði tekið. Vonandi leiðir þetta til þess að nú komist einhver skriður á málin.

Mótmæli á Kjalarnesi

Athugasemdir

[Magnús Geir Guðmundsson (IP-tala skráð) 12.6.2009 kl. 19:19]

Hvað er að vegum þar?

Hef margoft keyrt þarna án vandræða, fínt malbik og allt merkt vel.

[Kolbrún Guðríður Haraldsdóttir, 12.6.2009 kl. 20:48]

Vegurinn er svo sem ágætur, sérstaklega ef allir keyra þar á löglegum hraða. En þar sem fæstir hægja niður í 70 km hraða þegar ekið er framhjá hverfinu verða þar oft umferðarslys, í fljótu bragði man ég eftir 3 dauðaslysum akkúrat á þeim kafla. Þannig að það þarf að grípa til enn betri úrræða þar til að lækka hraðann (þar er nú þegar skilti sem blikkar þegar maður keyir of hratt). Einnig þyrfti að loka fyrir að hægt sé að beygja af og inná þjóðveginn við Klébergsskóla, mjög hættulegur staður og stækka afreinina (eða hvað sem þetta heitir nú) við Vallargrund (Olís) til að taka við meiri umferð þar.

[Friðrik Dagur Arnarson, 13.6.2009 kl. 01:00]

Þarna er spilað upp á heppnina og sagan segir okkur að hún virkar því miður ekki alltaf. Dauðaslys og alls kyns óhöpp sýna okkur að þetta er ekki í lagi eins og það er og það verður að gera eitthvað strax, því bráðum gæti auðveldlega verið of seint. Var á góðum fundi uppi í Klébergsskóla í kvöld og mér sýnist að íbúarnir ætli að þessu sinni ekki að láta sér duga loforð sem ekki eru efnd. Það er gott.

[Magnús Geir Guðmundsson (IP-tala skráð) 13.6.2009 kl. 04:33]

Hvað vantar þá? Og hver eru loforðin?

Hvernig verða þessi dauðaslys?

Eru þetta börn sem eru að leika sér á veginum eða eru það farartæki sem eru að beygja inn á umferð sem er of hröð miðað við þeirra hraða?

Skil ekki hvað vandamálið er..... kemur ekki fram í greininni. Vinstri beygjan eða hægri beygjan úr kjalarnesinu inn á þjóðvegin?

[Friðrik Dagur Arnarson, 14.6.2009 kl. 00:35]

Hraðakstur í gegnum byggð, því byggðin er báðum megin þjóðvegar. Börnin þurfa yfir veginn í skólann og til að hitta félagana, skólabíllinn þverar veginn nokkrum sinnum á dag. Skólinn er 80 metra frá þjóðveginum þar sem sett er upp skilti um 70 km hámarkshraða (á meðan annars staðar þar sem hringvegurinn fer í gegnum byggð er 50 km) sem alltof fáir virða. Fjöldi vega liggur inn á veginn þarna og innákeyrsla skapar mikla hættu. Þarna vantar meira eftirlit, undirgöng fyrir gangandi vegfarendur, en kannski fyrst og fremst vitundarvakningu um að þarna þarf að fara að með gát. Eftir að hafa fylgst með umferð þarna síðan kona mín lenti þarna í slysi þar sem 3 létu lífið, hef ég sannfærst um að þarna er mikið starf óunnið áður en nóg er að gert.