Tap - nei í raun ótrúlegur sigur

Það er ótrúlegt að þjóðin skuli ekki refsa flokknum meira en þetta. Skattahækkanir á almenning, aukin misskipting, einkavinavæðing, skipan ættingja og vina í embætti, eftirlitsleysi með fjármálaöflum en njósnir um almenning, móttaka svo hárra styrkja frá aðilum sem síðan hafa fengið mikla og sértæka fyrirgreiðslu frá opinberum aðilum í staðinn, ruddaskapur gagnvart náttúrunni - allt þetta og fleira af sama tagi hefur nú fengið uppáskrift um fjórðungs kjósenda sem lýsa þar með yfir að þeir samþykki svona stefnu. Það hlýtur að teljast sigur að geta talið fjórðungi kjósenda trú um að maður geti hagað sér eins og manni sýnist og kjósendur eigi svo að ganga gæsagang í takt og klappa fyrir þeim sem slepptu siðferði og sanngirni í stjórnarháttum sínum. En það er samt með ólíkindum hvað þetta lið er gagnrýnilaust og jafnframt sorglegt.

Sjálfstæðisflokkur tapar

Kosningabarátta Sjálfstæðisflokksins

Ætti maður ekki að vera farinn að átta sig á því hvernig Sjálfstæðisflokkurinn vinnur? Jú, auðvitað, en samt nær hann alltaf nýjum hæðum í lágkúrunni. Þeir hafa staðið fyrir auglýsingum sem eru á mörkum hins ólöglega, ef ekki handan þeirra marka, þeir reka hræðsluáróður í stað þess að segja frá eigin stefnu, "látum þá neita því"-barátta er rekin á fullu þannig að fram eru settar ósannar eða skrumskældar fullyrðingar í von um að almenningur sjái ekki í gegnum málflutning þeirra í tíma. Þeir eru á mjög veikum, siðferðislegum grunni en gallinn er sá að þeim er meira í mun að ná völdum svo þeir geti haldið áfram að blóðmjólka land og þjóð en sýna ábyrgð og gott siðferði.

Svona gerir ekki fólk með merkilegan eða góðan málstað. Vonandi áttar fólk sig á því hvernig staðið er að málum; skítkast í stað umræðu, rangfærslur í stað málefna, hræðsluáróður í stað hvatningar og uppbyggingar.

Ég las einhvern tímann málshátt sem sagði að ekki hvítnaði krákan þó hún kastaði skít í aðra. Í því ljósi er gott að rifja upp nokkur atriði

1. Sjálfstæðisflokkurinn ber höfuðábyrgð á hruninu og íslenska afbriðgði þess.

2. Hann hefur orðið ber af spillingu og þegið stórfé frá aðilum sem hafa síðan fengið annars konar fyrirgreiðslu en almennt var fáanleg.

3. Hann jók mjög misrétti og misskiptingu auðs hér á landi í valdatíð sinni.

4. Í tíð hans jukust mjög skattar á almenning, þrátt fyrir uppsveiflu í hagkerfi heimsins.

5. Hann misfór með vald í skipun embættismanna, ekki síst dómara. Við sitjum uppi með þær gjörðir áfram þó tekist hafi að koma flokknum frá völdum að sinni. Og dómar endurspegla því miður að flokkurinn er kominn til að túlka lögin.

Svona væri hægt að halda lengi áfram. En þetta er í raun nóg til að enginn hugsandi maður sem metur heiðarleika, ábyrgð og siðferðiskennd getur kosið flokkinn á kjördag.

Að hagnast á auðlindum landsins

Ég var að horfa á borgarafundinn í sjónvarpinu áðan og ég verð að viðurkenna að mér ofbauð að heyra þröngsýni og úrræðaleysi sumra stjórnmála"skörunganna" sem þarna sátu. Mikið var talað um að við verðum að nýta auðlindirnar og hafa af þeim tekjur - ekki síst á þessum tímum, sem eru eins og við skulum ekki gleyma, afleiðing af hugmyndaauðgi Sjálfstæðisflokks og Framsóknar. Og Frjálslyndir, Framsókn, Sjálfstæðismenn og því miður, Samfylkingin virtust ekki þekkja neina aðferð til þess að nýta náttúruauðlindir nema að virkja þær. Þessir snjjöllu hugsuðir virðast ekki átta sig á því að það er hægt að fá mun meiri tekjur til lengri tíma  með mörgum öðrum aðferðum. Við eigum ekki að ákveða skammsýnar ráðstjórnaraðgerðir sem virka eins og að pissa í skóinn okkar til að hita okkur í bili, af því við verum að hafa vit á því að horfa til lengri tíma og skoða samhengi hlutanna. Óafturkræfar skemmdir með virkjunum munu spilla verðmætum, eyðileggja framtíðarmöguleika og skapa ofþenslu, eins og gerðist með Kárahjúkavirkjun og ruddi um leið brautina fyrir sukk og fjárfestingafyllirí. Slík vegferð þýðir aðeins að við stöndum í mun verri sorum eftir skamman tíma. Munum líka að við fáum t.d. mun meiri arð af Gullfossi og Geysi núna en ef við værum búin að svipta þá frelsi og raska ímynd þeirra og ásýnd.

Náttúrulegt, upprunalegt, friður og ró, upplifun, fjölbreytileiki, framandleiki, samhengi og andstæður, heildir og einingar..., allt eru þetta verðmæti, auðlindir, sem hægt er að vinna með á sjálfbæran hátt, þann hátt sem framsýnir hugsuðir eru búnir að sjá og skilja að er ein leiðin til að tryggja góða samtíð og von til framtíðar. Ár og jarðhitasvæði bjóða upp á allt það sem hér var nefnt og svo margt fleira. Ég efast líka um að þetta fólk hafi leitt hugann að því hvað landslag er mikilvæg auðlind eða hugsað um það hversu það vex stöðugt að mikilvægi. Landslag háhitasvæðanna er mjög sjaldgjæft á heimsvísu þó það sé á allnokkrum stöðum hérlendis. Þess vegna er það verðmætt. Fossar og flúðir búa yfir síkviku dulmagni sem sefar og kveikir íhugun og öflug hugsanatengsl. Þess vegna er það verðmætt. Virkjanir eyða þessum verðumætum, breyta svæðunum og svipta þau líka ímyndinni um að þau séu upprunaleg, náttúruleg og óspillt. Og ímyndir eru eitt það mikilvægasta sem nokkur á í dag og það er sannarlega hægt að hagnast á þeim. Hvenær ætlum við að hætta að fórna alltaf meiri verðmætum fyrir minni?

Það er sorglegt að sjá hvernig hræðsluáróðurinn er rekinn og 2007-lausnirnar eru það sem haldið er að fólki sem eina bjargræðinu. Það sorglegasta er síðan það að of margir þora ekki að virða hlutina fyrir sér af meira víðsýni en láta sogast með inn í þessi hjólför skammsýni og úrræðaleysis staðnaðra lausna og veita svona málflutningi brautargengi. Og svo lengi sem þetta verður svona þá mun engin raunveruleg endurreisn eiga sér stað hér á landi og við fáum að hjakka í sömu gömlu hugsuninni - og svo verður reikningurinn bara sendur á börnin okkar og barnabörnin eins og venjulega. Það er valkosturinn sem stendur þjóðinni til boða núna, hvorki meira né minna. Ef við erum ekki til í að skrifa alltaf óútfylltan víxil á börnin okkar verðum við að staldra við, standa upp og mótmæla - og aldrei styðja þau öfl sem þetta vilja, þó sauðargæra úlfanna sé fólgin í yfirlýsingum um 20.000 störf, framsóknarskynsemi eða "fagra Ísland".

Einar K. Guðfinnsson og heiðarleiki xD

Í fyrirsögn á visir.is er haft eftir Einari K. að heiðarleiki sé aðalsmerki Sjálfstæðisflokksins. Á hvaða lyfjum er maðurinn? Það virðist hafa verið eitthvað skrítið nammið sem var í páskaegginu hans. Afrekaskrá undanfarinna vikna og mánaða sýnir svart á hvítu að heiðarleikinn og Sjálfstæðisflokkurinn hafa ekki átt samleið lengi, lengi. Að tala um óheiðarleika og íhaldið í sömu andrá er svipað og að nefna snöru í hengds manns húsi. Þegar ég las fyrirsögnina upphátt áðan fyrir fólkið sem var í kringum mig var spurt í forundran "Er maðurinn hálfviti"? Kannski er þetta bara svona óskapleg óskhyggja. En ef hann trúir þessu sjálfur í alvöru er ég hræddur um að svarið geti í raun bara verið eitt.

Heiðarleiki Sjálfstæðismanna

Það virðist sama hvar borið er niður þessa dagana hjá sjálfstæðismönnum. Alls staðar eru dæmin um það hvernig staðið er óheiðarlega að málum. Styrkjamálið er dæmi um stefnu og heiðarleika þessa flokks í hnotskurn, að fara í kringum lög og skara eld að eigin köku án siðrænna viðmiða. Og svo taka þeir niðurstöður fólks sem hefur vit á hlutum og gera að sínum án þess að fara rétt með, eins og þessi frétt ber vitni um. Siðferðiskennd fólks sem svona hagar sér aftur og aftur og ítrekað er ansi brengluð og í raun með ólíkindum að þessi flokkur skuli enn mælast yfir 20% í skoðanakönnunum. Það er enn ein brenglunin sem vonandi fer að eldast af þjóðinni.

Frábiðja sér misnotkun í pólitískum tilgangi

Ótrúlegt minnisleysi Sjálfstæðisflokksins

Hvernig getur fólk tekið mark á Sjálfstæðisflokknum eftir nýjustu uppákomuna hjá honum. Enn einn skandalinn. Þrjátíu milljónir þykja nokkur upphæð í  bókhaldinu hjá flestum en nú keppast sjálfstæðismenn við að sverja af sér þátttöku í þessu máli og meira að segja vitneskju um þetta allt. Samt virðist ljóst að flokkurinn beitti sér fyrir að fá þessa peninga en síðan veit enginn neitt um neitt. Ekki mjög trúlegt svo ekki sé meira sagt. Sjálfsagt vita þeir ekki heldur til hvers peningarnir voru notaðir. Þetta er náttúrulega ekki boðlegt. Subbulegt mál er bara orðið enn sóðalegra við þessi viðbrögð og tilraunir leiðtoga flokksins til hvítþvottar.

Það verður að segjast að nóg var komið af "afreksverkum" þessa fólks. Óheiðarleiki þess og siðleysi er  búið að koma þjóðinni á kúpuna en samt hagar það sér inni á Alþingi eins og það sé flekklaust og saklaust af öllu hruninu. Kannski trúa sjálfstæðismenn þessu sjálfir og einnig því að ef maður afneitar ábyrgð og vitneskju, t.d. um risaframlög í flokkssjóð þá sé allt í lagi. Vonandi trúa kjósendur slíku ekki né verða slegnir "sjálfstæðisflokksgleymskunni" á kjördag, því annars greiða þeir hruninu og 30 milljónunum atkvæði sitt á kjördag. Það er sannarlega ekki það sem við þurfum á að halda núna.

Brunnmiga - glæsileg framtíðarsýn!

Það er sorglegt að sjá að þetta lið hefur ekkert skilið, ekkert lært og virðist ekki hafa neinn vilja til að átta sig á víðara samhengi hlutanna. Það er enn sama stóriðjuáherslan, sama skammtímanotkunin á náttúrunni á dagskrá og svo á þetta bara að reddast. Aðrir verða að taka til eftir sóðaskap þeirra, enda eru þeir að komast upp á lagið með það og þykir ekki tiltökumál. Sjálfbær þróun vefst fyrir þeim og það er enn verið að leita að stórkarlalegum lausnum í anda 2007. Það er búið að sýna fram á að það er ekki hægt að haga sér bara eins og manni sýnist. Ekki er hægt að ganga á loftgæði og auðlindir án þess að það skerði mjög möguleika komandi kynslóða að lifa mannsæmandi lífi. Það þykir ekki gáfulegt að pissa í brunninn sinn. Það er nefnilega vel til þess fallið að spilla framtíðarmöguleikum þeirra sem ætla að nota hann. En Sjálfstæðismenn og Framsóknarmenn virðast endalaust vera til í að vera hinir íslensku brunnmigar og munu vafalaust renna saman í ríkisstjórn um hvers kyns auðlindasóðaskap og sérgæsku. Þeim er enda mikið í mun að tryggja að þeir sem sölsuðu undir sig eignir og fé í nafni þeirra geti haldið áfram að eignast það sem þeir ekki eiga og ættu ekki að eiga. Þannig tryggja þeir áframhaldandi tök sín á landi og þjóð - þjóð og landi til tjóns.

Sjálfstæðismenn og framsóknarmenn í meirihluta

Hesthús við Elliðaár

Þetta hesthúsamál er með ólíkindum og engan veginn hægt að skilja það nema ef það liggja einhver hagsmunatengsl þar að baki sem ekki er búið að upplýsa um. Umhverfis- og samgönguráð Reykjavíkur fjallaði tvisvar  um málið og var sammála um að þetta væri hvorki skynsamlegt fyrir árnar, heppilegt fyrir nýtingu þessa opna svæðis (eins og það er skilgreint) né þarft. U&S ályktaði því sameiginlega gegn því að skipulagið yrði samþykkt. Ekki var hlustað á það í skipulagsráði og ekki tekið neitt tillit til gagnrýni umhverfisráðsins, að því er ég hef heyrt á þeirri forsendu að U&S komi þetta ekki við. Ég veit ekki hvernig menn finna það út að ráðið hafi ekki beina aðkomu að máli sem tengjst framtíðarnotkun Elliðaánna og nágrennis. Svæðinu er ógnað, þrátt fyrir yfirlýsingar tæknikrata sem halda að alltaf sé hægt að stýra náttúrunni eftir áætlun sem unnin er með reglustiku. Í fyrsta lagi er fjölda hrossa safnað saman á bökkum árinnar og það eitt og sér eykur líkur á að  mengun berist út í árnar frá sjálfu hesthúsasvæðinu. Í öðru lagi mun þetta stórauka alla umferð að svæðinu, bæði bíla og eins hesta sem fara um stíga við ána. Aukin mengunarhætta! Þá þrengir þetta að ánni þegar hún flæðir - og því er hún örugglega ekki hætt. Garðar sem eiga að vernda svæðið (hvort sem þeir gera  það svo þegar til kemur) koma í veg fyrir að áin geti breitt úr sér. Vatnið fer því um þrengri farveg og eina ráðið fyrir það er því að fara hraðar en ella. Hvaða áhrif hefur aukinn straumhraði á framburð árinnar, botn og lífríki? Hafa sérfræðingar borgarstjórnar sagt til um það? Það er líka hluti af náttúrulegri hringrás flestra vatnsfalla að flæða upp á bakka sína og sækja sér efni sem berst síðan út í ána. Lífríkið er lagað að slíkum aðstæðum. Margt er búið að gera við Elliðaár sem hindrar slíkt fram til þessa dags og er þá á vitleysuna bætandi? Þá þrengir þetta að möguleikum allra annarra hópa til að nýta þetta svæði, nokkuð sem U&S ræddi mikið á sínum fundi. Ég gef lítið fyrir þau rök að þarna hafi verið hesthúsahverfi inni á skipulagi. Það hlýtur að vera markmið skipulagsyfirvalda að hafa puttann á púlsi samfélagsins alls og laga skipulag að breyttum áherslum og nýrri hugsun. Þess vegna eru jú skipulagsáætlanir endurskoðaðar reglulega. Og það hefur margt breyst á hálfu ári. Ef svona kerfiskarlahugsun væri ríkjandi í læknisfræði þá væru menn enn að taka blóð úr öllum sjúklingum til að lækna þá, sama hvað að þeim væri. Þá segir ekkert í aðalskipulaginu um hvað stórt og frekt svæðið eigi að vera. Og má ég spyrja, hvað í ósköpunum eru menn að draga upp hugmyndir um "hestapensjónat" árið 2009? Þarna er sem sagt inni hugmynd um þjónustumiðstöð fyrir hestamenn þannig að þeir geti átt hross í húsi, einhver sjái um hestinn fyrir þá allt árið um kring, þannig að það eina sem þeir þurfi að gera sé að koma og taka þjálfaðan, kembdan og greiddan hest og ríða út. Svo sé hægt að skila honum aftur inn á pensjonatið. Bara að gera þetta skemmtilega, láta aðra um það sem er ekki eins spennandi. Ofboðslega 2007, ekki satt og hefur mikið uppeldislegt gildi! 

Já þetta mál er allt undarlegt, ekki síst að þetta skuli keyrt svona áfram. Það meira en læðist að manni sá grunur að þarna sé verið að drífa mál í höfn fyrir vini og pólitíska stuðningsmenn - þvert á hag almennings og án tillits til lífríkis og umhverfissjónarmiða. Slíkt er eitthvað sem Sjálfstæðismenn hafa stundað grimmt á undanförnum árum og fátt sem bendir til að þeir ætli nokkuð að draga úr því (nema þá kannski ekki eins mikið fyrir opnum tjöldum) - því miður. Og Framsókn hefur jafnan dugað þeim vel til slíkra verka enda féllust núvernadi meirihlutaflokkar í borginni í faðma í þessum tilgangi, fyrst og framst. Fyrir það gjalda almenningur og Elliðaárnar.

Frumkvöðlar og "vinir" þeirra fagfjárfestarnir.

Það er einhvern veginn svo að alltaf þegar maður fer að kynna sér eitthvað varðandi fjármálakerfið, eins og það er búið að vera, þá verður maður hissa. Mjög hissa. Eitt af því sem ég hef skoðað dálítið að undanförnu er aðkoma lífeyrissjóðanna að fjárfestingasjóðum sem gefa sig út fyrir að styðja við bakið á nýjum og upprennandi fyrirtækjum. Þó lífeyrissjóðirnir leggi jafnvel til um 3/4 af fjármagninu þá eiga þeir ekki aðild að stjórn fjárfestingasjóðsins og hafa mjög takmarkað um það að segja hvernig hann semur við sprotafyrirtækin og kemur síðan fram við þau í framhaldinu. Þannig er fjármagn almennings í lífeyrissjóðum, sem hefur að minnsta kosti fram til þessa verið litið mjög jákvæðum augum, sett í hendurnar á atvinnufjárfestum, en reynsla síðustu ára sýnir að þeir eru ekki allir alltaf uppteknir af siðrænum lögmálum og góðum viðskiptaháttum. Slíkir aðilar sigla því í jákvæðu nafni lífeyrissjóðanna en haga sér síðan eins illilega "2007" og þeim sýnist.

Auðvitað eru til góðar sögur af heiðarlegum viðskiptum og velheppnuðu samstarfi. Þær sögur sýna að þetta á alveg að geta gengið og einstaklingar og þjóð haft af þessu bættan hag og ánægju. En hitt er bara líka svo algengt. Þau eru orðin nokkur sprotafyrirtækin sem hafa orðið fyrir ósvífni fjármálamanna sem koma inn í þau sem fjárfestar. Frumkvöðlar eru ekki endilega miklir sérfræðingar í viðskiptasamningum og þegar fagfjárfestir kemur "til lið við þá" undir fögrum flöggum, ekki síst lífeyrissjóðanna, þá er það mannlegt að trúa að nú sé að fara í gang jákvæð uppbygging á traustum og heiðarlegum grunni. Of oft gerist það að frumkvöðlarnir vakna upp af værum blundi þegar nýi vinurinn og sérfræðingurinn í að koma fyrirtæki þeirra á flug reynist fyrst og fremst hafa aðrar hvatir en þær að styðja við bakið á þeim sem ruddi brautina. Allt í einu standa þeir frammi fyrir því að fjárfestirinn hefur bara áhuga á eigin hag og er búinn að búa sér svo í haginn svo hann geti náð stærri sneið af kökunni en eðlilegt getur talist, ef fyrirtækið virðist vera að ná sér á flug. Þá kemur kannski í ljós að það var eitthvað inni í hluthafasamkomulagi sem frumkvöðlarnir áttuðu sig ekki á í upphafi, af því þeir treystu fjárfestunum. Þá er reynt að kæfa frumkvöðlana og kúga til hlýðni því annars vofir yfir að "samstarfinu" verði slitið og fjárfestirinn hirði allt fyrir lítið sem ekki neitt.

Stóra spurningin hlýtur alltaf að vera sú hvort harðdrægir, ósvífnir fjármálamenn eigi að geta komist í slíka aðstöðu að þeir geti nýtt sér lögfræðingastóð, viðskiptafræðingagengi og annað lið á sínum vegum til að þjarma að frumkvöðlum sem ekki hafa sams konar hóp á bak við sig. Þar er ójafnt í liðum þegar í slaginn er komið, slag sem fer þar að auki fram á heimavelli fjárfestisins en ekki frumkvöðlanna. Erum við ekki búin að fá nóg af þessu freka og yfirgangssama fjárfestingahyski sem hefur vaðið yfir allt og alla undanfarin ár og skilið okkur eftir í skítnum? Ég held að flestir geti tekið undir það. Þess vegna verða lífeyrissjóðirnir að taka aðkomu sína að fjárfestingasjóðum til algjörrar endurskoðunar og sjá til þess að völdin séu hjá þeim sem leggja til fjármagnið og vita hvað félagsleg ábyrgð, heiðarlegir viðskiptahættir og siðrænar leikreglur þýða. Það má bara ekki viðgangast lengur að þeir láti harðdrægum sérhagsmunaseggjum þau völd í té sem fylgja því að fá að véla með stórar fjárfúlgur sem þeir eiga ekki einu sinni sjáfir.

Hvað er að þessu liði?

Ég var að horfa á Kastljós í kvöld. Þar lét Birgir Ármannsson "ljós" sitt aldeilis skína. Það er greinilega búið að gefa út harðlínutilskipun hjá Sjálfstæðisflokknum og það á að berjast - til að berjast -  í öllum málum. Þetta er líklega aðferð þeirra til að draga athyglina frá þeirri staðreynd að þessi flokkur ber öllum öðrum meiri ábyrgð á stjórn efnahagsmálanna á undanförnum áratugum. Þetta er þó ábyrgð sem flokkurinn og meðlimir hans ætla sér alls ekki að axla. Það er ótrúlegt að sama liðið og setti landið á hausinn skuli leyfa sér að koma fram fullt af heilagri vandlætingu og hrópa um "skattmann" og álögur og niðurskurð rétt eins og það hafi hvergi komið nálægt því að valda vandanum. Siðferðisleg ábyrgð þekkist ekki hjá þeim, ekki er þjóðinni sýnd auðmýkt og iðrun heldur er vaðið fram af hroka og yfirlæti. Sú framkoma kristallaðist í viðtali við N1-formanninn í dag þar sem hann sagði að naflaskoðun flokksins hafi sýnt að þau gildi sem menn vilji hafa í framtíðinni séu nákvæmlega sömu gildin og flokkurinn hefur barist fyrir á undanförnum árum. Engin smáræðis endurskoðun á grunngildunum sem steyptu þjóðinni í skuldafenið.

Það væri betra að kjósendur hlustuðu á hvað þessi orð þýða í raun. Gildin sem hafa verið í gangi hjá Sjálfstæðisflokknum og nýi sópurinn hlýtur því að vera að tala um, eru t.d. lögmál frjálshyggjunnar, einkavinavæðingin, skoðanakúgun (t.d. á fræðimönnum, fréttamönnum og svo almenningi), niðurskurðinn á eftirliti með fjármálaöflunum (en ekki með almennum borgurum), misskipting auðs, samþjöppun eignarhalds, embættisveitingar til vina og ættingja, sjálfsdýrkun, nýðingsverk í náttúrunni og afneitun gilda sjálfbærrar þróunar, skammtímalausnir og það að forgangsraða  peningum framyfir fólk (nema náttúrulega fólkið sem er í klíkunni). Það er ekki skrítið þó BB vilji halda áfram á sömu braut. Flokkurinn er búinn að láta verkin tala og á hliðarlínunni bíða hákarlar sem eru búnir að koma sínu misvel fengna fé undan, tilbúnir að kaupa allt á brunaútsölu og halda svo áfram að styðja FLOKKINN. Áfram sömu gömlu og góðu gildin. Og skoðanakannanir sýna að meira en fjórðungur þjóðarinnar virðist ætlar að kvitta upp á reikninginn og borga hann fyrir sukkarana - líklega með glöðu geði. Ótrúlegt, alveg ótrúlegt!