Gestastofa Reykjavíkur og landverðir innan borgarmarkanna

Ég er búinn að tala um það í mörg ár að það þurfi að stofna Gestastofu Reykjavíkur til að styðja við bakið á ferðaþjónustu í borginni. Reykjavík er fjölsóttasti ferðamannastaður landsins og þjónustan sem þar er boðið upp á nýtist einnig heimamönnum og íbúum nágrannasveitarfélaga. Innan borgarmarkanna og í kraga umhverfis höfuðborgarsvæðið er perlufesti af náttúruperlum sem eru frábærar til útivistar, náttúruskoðunar, fræðslu og lífsfyllingar. Það er í raun merkilegt að ekki skuli hafa verið gerðar meiri tilraunir til að skapa og efla náttúruferðamennsku í borginni, miðað við þær mögnuðu aðstæður sem fyrir hendi eru. Náttúruferðamennskan er í raun stórvannýtt sóknarfæri fyrir ferðaþjónustuna sem full ástæða er til að huga nánar að, eins og ástandið er í þjóðfélaginu.

Gestastofur eru víða reknar á ferðamannastöðum, ekki síst á friðlýstum svæðum. Hlutverk þeirra er m.a. það að taka saman upplýsingar um umhverfi, bæði náttúrulegt og menningarlegt, setja þær fram með notendavænum hætti, bjóða upp á aðstoð, fræðslu og aðra þjónustu sem tengist umhverfisskoðun. Þær geta líka verið ákveðið skjól og aðstaða fyrir aðra aðila sem eru að vinna að svipuðum málum. Gestastofa Reykjavíkur myndi starfa náið með Höfuðborgarstofu og aðrir samstarfsaðilar gætu t.d. verið Náttúruskólinn í Reykjavík, Reykjanesfólkvangur  og útivistarsvæði Orkuveitunnar.

Landverðir eru starfandi í gestastofum og á svæðum sem þær ná til. Þeir sjá m.a. um fjöbreytta fræðslu, upplýsingagjöf, gönguferðir og barnastunda. Landvarsla er sérhæft starf sem byggir á fræðsluaðferð sem kölluð er umhverfistúlkun og miðar að því að auka skilning og tilfinningu gesta fyrir mikilvægi þeirra staða sem þeir skoða. Með því að koma upp gestastofu og ráða landverði til borgarinnar væri stórt skref stigið til að opna augu heimamanna og gesta á umhverfi og náttúru svæðisins. Þar með skapast aukin ánægja og fjölbreytni fyrir fólk sem statt er í borginni. Þetta myndi efla Reykjavík sem ferðamannastað og skapa velvild og löngun til að koma aftur í heimsókn. Það er þekkt staðreynd að ekkert er betri auglýsing en ánægður gestur, sem segir frá þegar hann kemur heim til sín. Það væru því slegnar margar flugur í einu höggi ef þetta skref yrði tekið. Ferðaþjónustan myndi styrkjast og fjölbreytni í afþreyingu myndi aukast  um leið og náttúran væri vernduð. Og um leið yrðu til störf sem myndu efla starfsemina í borginni og skapa mikilvægar tekjur. Er eftir einhverju að bíða með að hefjast handa?

Athugasemdir

[Steinar Frímannsson (IP-tala skráð) 6.3.2009 kl. 21:36]

Sæll Diddi

Aðeins eitt slæmt við þessa hugmynd.  Það er hvar hún er sett fram.   Ég er hræddur um að hún nái ekki augum þeirra sem gætu komið þessu í framkvæmd, svona á lítt þekktri bloggsíðu.    Þín mývetnska hógværð dugir lítt í svona máli. 

Kveðja

Steinar Frímannsson

[Friðrik Dagur Arnarson, 7.3.2009 kl. 01:38]

Takk fyrir athugasemdina Steinar. Já, þarna vegur hún sjálfsagt ekki þungt, en ég er búinn að koma henni fram á nokkrum stöðum innan borgarkerfisins, svo sem í menningar- og ferðamálaráði og borgarráði. Nú er komin í gang nefnd á vegum menningar- og ferðamálaráðs sem á að skoða tækifæri í ferðaþjónustu og ég er í henni. Þar mun ég að sjálfsögðu beita mér fyrir þessari hugmynd, eina ferðina enn og vonandi ber samstarfsfólkið gæfu til að styðja þessa hana, af því hún felur í sér svo mikil og góð sóknarfæri.