Ekki hörð frjálshyggja!

Var að horfa á viðtal við Bjarna Ben. þar sem hann segir það rangt sem haldið hefur verið fram, að hérlendis hafi verið viðhöfð hörð frjálshyggja. Þó hann ætti í sjálfu sér að vita þetta, eftir að hafa verið á kafi í þessu sjálfur, vil ég samt leyfa mér að efast um mat hans. Það eru nefnilega svo fáir góðir dómarar í sjálfs síns sök. En segjum samt að hann hafi nokkuð til síns máls. Er það þá ekki verulegt umhugsunarefni, að það sem hann telur væga frjálshyggju skyldi geta leikið samfélagið jafn grátt og raun ber vitni? Segir þetta ekki allt sem segja þarf um það hversu stórháskalegt fyrirbæri frjálshyggjan er? Það þýðir ekki fyrir frjálshyggjuliðið að neita því að hluti af henni er galopnun kerfisins og afnám eftirlits og reglna, því markaðurinn á að leiðrétta alla hluti sjálfur og það getur hann ekki ef reglur grípa fram fyrir hendurnar á honum. Þessu hélt þetta fólk fram meðan allt leit út fyrir að leika í lyndi. Bjarni sagði líka að Sjálfstæðisflokkurinn þurfi ekki að endurskoða hugmyndafræðilegan grundvöll sinn. Vægast sagt merkileg yfirlýsing í ljósi þess, að þessi grundvöllur er búinn að steypa þjóðinni í gjaldþrot. En það var gott og mikilvægt að fá að vita að komist flokkurinn til valda, megum við eiga vona á meiru frá honum af því sama og keyrði okkur í þrot, sjálfsagt eins lengi og gammarnir geta krækt í eitthvað frá þjóðinni og sölsað undir sig. Vonandi átta kjósendur sig á hvað yfirlýsingar Bjarna þýða í raun og gleyma því ekki fyrir kjördag.

Athugasemdir

[Þráinn Kristinsson (IP-tala skráð) 4.3.2009 kl. 10:31]

Ég er sammála... þetta er óskýr lína sem Bjarni formannskandítat gefur fótgöngulíði sínu.

Ef það ekki Laizzes Faire hugmyndafræði viðskiptaráðs og Sjálfstæðisflokksins sem felldi Íslands þá hlýtur hann að vera með aðra skýringu á Hruninu.  Hann liggur sjálfsagt yfir þvi verkefni með PR ráðgjöfum sínum.  Þegar kosningar nálgast mun hann kasta fram einhverri bombu þar sem einhverjun dyggum einstaklingum innan flokksins verður fórnað opinberlega - svipað og Cheney og Bush gerðu með Tenet yfirmann CIA þegar kamarinn fór að brenna hjá þeim.